حبي نفسك.. وقت قوتك هيتمنوا حتى كلمة منك

 

سها البغدادي 

أوراق الورد 🌹 سها البغدادي 

في لحظة ما، لازم توقفي وتسألي نفسك: هو أنا ليه مستنية تقديري من الناس؟ وليه قيمتي مرتبطة بنظرتهم ليا؟

حبي نفسك أولًا.. اهتمي بصحتك، بشغلك، بنجاحك، وبكل حاجة بتخليكي فخورة بنفسك.

لما مكنتيش بتحبي نفسك، كنتِ بتدي مشاعرك كلها لناس مش مقدّرة قيمتها، ومهما اديتي ومهما ضحيتي، كان دايمًا ناقصهم حاجة اسمها التقدير.

لكن لما تبدأي تحبي نفسك بجد، هتكتشفي إن أهم تقدير في الدنيا هو التقدير اللي بيبدأ من جواكي.

متستنيش حد يقولك إنك جميلة أو ناجحة أو تستحقي الحب عشان تصدقي ده.

اشتغلي.. انجحي.. اهتمي بصحتك.. وطوري نفسك.

لأنك لما تهتمي بنفسك، الدنيا نفسها هتبدأ تبان بشكل مختلف.

والأجمل إن ناس كتير كانوا شايفينك ضعيفة، أو سابوكي في أصعب وقت،  يومًا ما هيتمنوا حتى فرصة صغيرة يكلموكي فيها.

بس ساعتها متكونيش مستنياهم.

كوني مشغولة بنفسك، بحياتك، بنجاحك، وبالنسخة الجديدة منك.

طبطبي على نفسك، وامسحي دموعك، ومتستنيش عودة خائن، ولا اعتذار شخص خذلك، ولا اهتمام إنسان اختار يبعد وقت احتياجك.

اصمدي.. قاومي.. وفوقي قبل فوات الأوان.

متخليش تجربة وجعتك تقنعك إنك ضعيفة.

يمكن أنتِ بس كنتِ بتدي قلبك للمكان الغلط.

افتكري دايمًا:

اللي محبكيش وقت ضعفك، ممكن جدًا يتمنى نظرة منك وقت قوتك.

لكن القوة الحقيقية مش إنك تستني اللحظة دي عشان تنتقمي.

القوة إنك توصلي لمرحلة متبقيش محتاجة منهم حاجة أصلًا.

حبي نفسك.. لأنك تستحقي.

واهتمي بيها.. لأن العمر مش مستني.

وانجحي.. مش عشان تثبتي لهم إنهم خسروا، لكن عشان تثبتي لنفسك إنك مكنتيش يومًا قليلة القيمة.. أنتِ بس كنتِ ناسية قيمتك.