كتبت.. سها البغدادي
في عالم العلاقات، مش كل حد بيحبك بجد أو بيتعامل معاك بنية صافية. فيه نوع من الناس بيتفنن في التلاعب، في استغلال مشاعرك، وفي كسر نفسيتك باسم الحب أو الصداقة أو حتى الزمالة. الشخص النرجسي هو أحد أخطر أنواع الناس دي. ممكن ييجي في صورة شريك حياة، صديق، قريب أو مدير في الشغل. وسُمّه بيكون ناعم، بطيء، لكنه قاتل وهذه الشخصية الترجسية كانت محور مهم فى مسلسل الأميرة بطولة ياسمين صبري .
من هو الشخص النرجسي؟
النرجسي مش مجرد حد مغرور، لا، دي شخصية مضطربة نفسيًا عندها إحساس مبالغ فيه بالأهمية الذاتية، بتدور دايمًا على الإعجاب والانبهار، وبتفتقر للتعاطف الحقيقي مع الآخرين. هو شخص بيحب يكون في الصورة دايمًا، وأي حد حواليه مجرد وسيلة لتحقيق أهدافه.
إزاي بيستغل النرجسي اللي حواليه؟
1. بيدّيك اللي نفسك فيه في البداية
بيبدأ العلاقة بأسلوب ساحر، بيعرف يقراك ويوصل لك الإحساس إنه فاهمك أكتر من نفسك. بيغرقك بكلام حلو، واهتمام، وهدايا، وكل اللي بتحلم بيه.
2. بيدخل جوه عقلك بهدوء
بعد ما يكسب ثقتك، يبدأ يزرع الشكوك في نفسك. يقلل من إنجازاتك، يلمّح إنك مش كفاية، أو إنك محظوظ/ة إنه موجود في حياتك.
3. بيسحبك من نفسك خطوة خطوة
يحاصرك، يعزلك عن أصحابك وأهلك، ويخليك تعتمد عليه في كل حاجة. تبدأ تحس إنك مش قادر تاخد قرار بدونه، وإن قيمتك بقت متعلقة برأيه فيك.
4. بيكسر نفسيتك بشكل ممنهج
ساعات يتجاهلك، ساعات يهينك أو يسخر منك، ساعات يعمل نفسه ضحية علشان يحسسك بالذنب. كل ده بيعمله علشان يضعفك أكتر ويخلّي السيطرة أسهل.
5. لما تحاول تواجهه، يقلب الطاولة
يتهرّب من المسؤولية، أو يتهمك إنك أناني أو مجنون. وممكن يعيّط أو يمثل عليك إنه ضحية علشان يكسرك تاني بطريقة مختلفة.
ضحايا النرجسي: جروح مش باينة للعين
اللي بيتعامل مع نرجسي بيتأذي نفسياً بطريقة باردة وصامتة. الثقة في النفس بتتآكل، الأحلام بتتكسّر، والإحساس بالهوية بيتشوّه. الضحية بتعيش في دوامة شك وخوف ولوم لنفسها، وممكن تحتاج سنين علشان تفهم إنها كانت في علاقة سامة.
إزاي تحمي نفسك؟
اعرف العلامات بدري: أول ما تلاحظ تعظيم للنفس، تقليل من الناس، عدم تعاطف... خليك حذر.
حافظ على حدودك: ماتسمحش لحد يتدخل في قراراتك أو يحسسك إنك أقل.
اتكلم مع حد موثوق: صديق، متخصص، أو أي شخص بيساعدك تشوف الأمور بوضوح.
اخرج من العلاقة لو لازم: مش كل علاقة لازم نصلّحها، فيه علاقات لازم نهرب منها.
في النهاية...
مش كل حب أمان، ومش كل حد بيقولك كلام حلو بيحبك بجد. الشخص النرجسي ممكن يكسرك من جوا وإنت مش واخد بالك. حافظ على نفسك، واسأل دايمًا: "العلاقة دي بتكبرني ولا بتكسرني؟"
جميل كلام منطقى وعلمى ويدرس فى علم النفس البشرية
ردحذف