نوال الأمين. الكاتبه. وخواطر من الواقع

 

الحسن عبدالمهيمن/ السودان

الإسم: نوال مجذوب الأمين 

النشاة والمنطقة: الخرطوم

هواية الكتابة والخواطر متى بدأت عندك: كانت عندي محاولات كتابة من فترة الثانوي والجامعة

بمن تاثرتِ من الكتاب: في البدايات تأثرت بالكاتب السوري نزار قباني والروائية الجزائرية أحلام مستغانمي 

الفن والخواطر.. يشكلان ثنائي الروعة.. لمن تستمعين: أنا بسمع اللحن الحلووو والصوت والكلمات الجميلة

أغنيه ترددينها دوماً: بحب الأغاني التحفيزية المتفائلة بتديني طاقة حلوة ومتجددة

الجرافيك كيف تسللت إليك هذه الموهبة: الجرافيك والتصميم عموماً موهبة الإحساس بالجمال والألوان والرسم من الصغر وصراحة لسه بعتبر نفسي هاوية

رغم إني في فترة الحرب الحالية طورت شغلي ومهاراتي في التصميم بصورة كبيرة

الأسرة وتشجيعها لك: حقيقي أي شغل بخلصو بكون متشوقة أول خطوة إني أخد رأي والدتي وأخواتي وأسمع كلمات الإستحسان والتشجيع منهم قبل أعتمد شغلي بصورة نهائية 

كتاب الخواطر الشباب رأيك فيهم: صراحة نحن في السودان عندنا كتاب مبدعين جداً ومواهب أثبتت وجودها في كل مجالات الفنون والأدب بصورة كبيرة وليها بصمة واضحة وأكيد مستقبل مشرق جداً

أول عمل لك كان بعنوان ماذا: زي ما قلت في الأول أنا كان عندي محاولات قديمة من فترة الثانوي والجامعة، لكن أول عمل منشور لي كان مجموعة موضوعات متنوعة في المنتديات الأدبية وخواطر في السوشيال ميديا 

حابة أشارككم بي خاطرة بالدارجي من بداياتي

غرستك في أعماقي زهرة حب..

أريجها أمل حنين وهناء..

آية من رب العباد..

منزلة بس عشاني أنا..

دخلت حياتي زي الطيف.. بعدت الهم طردت الخوف..

وفي لحظة إتبدل عذابي منى..

وفي ساعات بديت أحلم وأمني النفس باللقيا..

أصبر قلبي بالتحنان وأقول بكره نبل الشوق..

وترجع ضحكتي الضايعه في وجودك ياعمري أنا..

وأسرح بخيالي بعيد هناك عندك تطوف الروح..

تفتش عن دفى روحك في عمرن يكون في حياتها أحلى سنة..

وآخر عمل لك: من أعمالي الأخيرة

والدنيا دي حلوة مهما يكون

لا زعله ولا أحزان بتكسرني

ولا بنهار عشان فاتني

لأني قوية بي نفسي

وبحب النور 

عشق وجنون

ولأنو الفرحة كل صباح بتوعدني 

تجبر خاطر أيامي

وترسم في طريقي شجون

رؤى وأحلام

تزين عمري بالألوان

وتطيب قلبي بي نبضو

لأنو الهادي لي روحي 

ولأنو حنون..